香港新浪網 MySinaBlog
« 上一篇 | 下一篇 »
Norman | 8th Nov 2008, 6:11 PM | 怪論 | (134 Reads)
 

最近看到議員們不停在外傭稅這問題上糾纏不清,老實講,我就真係對佢地反感到極,真係咁得閒,無野做搵D野來搞?而家金融危機殺到埋身,經濟下滑,企業倒閉,裁員,失業率上升等,開始打擊各行各業,人人擔心幾時會裁到自己,議員們假如真係咁熱心想幫市民解決問題,應該就搵D大問題和有明顯幫助的來搞,這才是大智慧,而家走去搵D雞毛蒜皮的來大做文章,只係給人一個極壞的印象,不懂分緩急輕重,好做唔做,年30晚謝灶的感覺!

  

又或者佢地個個都有請外傭,覺得每個月孝敬特區政府400元做再培訓好唔甘心,所以才咁積極去爭取永久取消吧?咁遲D香港的小業主是否也應該要求永久取消差餉和地租呢?反正而家政府都有幾千億儲備,肯定有大把水位走,十年八載唔收都得!

 

其實,我早排經已俾過條Link出來,星島的社論早就指出,這稅收其實係打劫外傭的人工得來的,理由係以東南亞國家的外傭人工來說,香港係最高的,所以就算減些少,也不用擔心請不到外傭,而事實也是如此,外傭也不會因為減了人工而轉到其他國家去。

 

所以,假如現在取消了外傭稅,那應否讓外傭的人工回復原狀呢?假如是的話,那外傭的僱主其實只係白忙,因為佢根本無慳到錢,而那些以為好醒的議員,結果做左豬頭炳,搞完一輪原來係無花果事件,吃力不討好。

 

假如佢地詐傻,想搏大霧唔加番人工俾外傭,咁就要搏一次,外傭的主權國會否透過外交途徑來抗議,因為這些窮國最近在金融海嘯衝擊下,經濟極惡劣,同時國庫空虛,正所謂窮人思舊債,你係佢你都會上訴啦,咁多外傭,每人每個月多400蚊可以匯回祖家,都可以幫補一下。

 

假如這情況真係發生,唔知D議員又會點好呢?這是外交層面問題,佢地根本唔識點搞好,而家只係門口狗,吠自己人就叻,真係搞個大頭佛出來,到時可能又要搞到香港名譽掃地!

 

http://www.singtao.com/yesterday/jou/1022jo01.html