香港新浪網 MySinaBlog
« 上一篇 | 下一篇 »
Norman | 29th Nov 2008, 10:17 PM | 理財投資 | (304 Reads)
 

相信很多人都很想致富,不過,能用得其法的人卻不多,原因是很多人都仲係傻下傻下咁去做,那當然是事倍功半啦,否則,人人都用恰當的方法,那世上早就是富人通街都係,但現實是社會上絕大部份係窮人,真正有錢的人不多,究其原因,就是還沒有找到關鍵所在,假如你想要致富,就要認真思考這問題,重新再考慮一下自己往後要走的路。

  

第一個方法,當然係嫁個有錢人啦。不過,先決條件係你最好係女人,仲要夠靚,可以迷死人,因為有錢人的數目少,要人家對你垂青,就要花點心思。假如你係男人,咁就難度高一點,因為有錢的女人數目更少,至於點至可以用到這方法,我都唔知,所以無可奉告,不過,香港就有一些成功人士,把這方法發揮得淋漓盡至,而且早就上埋岸添,想知的就不妨搵佢傾下,睇下佢地會唔會把這些關鍵告之有緣人啦。

 

第二個方法,就係去買六合彩。這個方法其實都係靠運氣,因為命中率只有千萬分之一以下,無乜技術可言,聽天由命好了,假如你好似肥姐在富貴逼人來中咁樣狂買法,命中率會高一些,不過就輸光的機會更大,所以要自己諗清楚應該買幾大至適當。假如你懶到連六合彩都唔想買,但又想發達,除非真係有舊錢從天而降,至於係咪賊贓就睇你的際遇了。

 

第三個方法,當然係靠正途打工或升職,不過就會好辛苦,隨時奉上一生的時間,也不一定有收成,因為而家經濟唔好,又無乜前景,老闆看的是你還有多少利用價值,假如無乜,咁你就係『前途似咁』,都可以作最壞的打算。同時,而家年輕一代,好多係未開始耕耘前就只係會問收穫會有幾多,真正肯付出的不多,就算遇到我係你老頂,咁樣的工作態度,我都不會提拔你啦。所以,假如你係諗住靠這方法致富的,唔該先要虛心學習和進修,努力裝備好自己,等待百樂來臨。

 

第四個方法,就係靠人事,靠關係,靠托大腳,擦鞋和拍馬屁等技倆,假如你自問無乜技能,不過又厚顏無恥到極,可以為左錢乜都可以出賣的,就是理想的人選,唔好以為好易,你睇下李連英就係一個人辦,不過,我就自問無這特異功能,我又好有自尊和骨氣,所以無法學習到這些下三流的功夫,也沒有這方面的心得可以分享。

 

第五個方法,就係偷呃拐騙,乜野衰野都出齊,總之除左好事唔做,就乜都敢做,包括犯法的事,不過,因為我係無膽之人,也無能力做到這境界,所以也無可奉告。

 

哈哈,笑就講完,講番正題啦,其實,除了以上所講,還可以靠自己做投資致富的,不過,在這個題目之下,事實上仍然有好多人在兜兜轉轉,不得其門而入。

 

其實,想致富都要用腦和食腦,千祈唔好又係得個做字,否則到頭來結果又係得個桔。首先你要盤算一下,你可動用的本金是多少,跟著是需要多少時間,與及多少收穫你就會滿足,咁好多人都梗係貪心到無人有,最好用一萬蚊,一年時間就有一億,不過唔好意思,你這個係夢想,唔係理想,留番發夢時搵周公講啦,又或者變成『你就想』!

 

想要致富,就要搞清楚,你是用大錢賺取合理回報,這是做投資,假如你用小錢賺取高回報,這是投機,我從來沒來定義,說投資或投機是好與不好,也不會說是道德或不道德,只是說,你應該用那個方法才是合適。

 

舉個例子,假如你有1000萬,在正常的投資環境下,一年賺10%並非難事,那你一年就有100萬的收益了,足夠正常人家幾年用啦,不過,問題是,你有這1000萬嗎?

 

假如你只有100萬,那一年10%的回報,也有10萬元,勉強也可以夠過活的。但假如你只有10萬,那肯定一年10%的回報是不足夠的,因為一萬元根本不足以維持生計。

 

你要用10萬元,一年賺取最少10萬的回報,即是回報率是100%了,在大牛市時,假如你行運選到會大升的股票,雖然機會是渺茫一點,但也不排除這可能性。

 

假如你只得1萬元,但卻期望一年可以賺10萬,即是一年的回報率是10倍,那在正常的情況下,投資根本沒可能可以做得到,這時你需要的是做投機炒賣,才有可能一年賺10倍。

 

不過,從以上的例子中,你可以看到,大資金賺取小回報難度不高,但用小資金賺取高回報,難度就大得多,假如你自問對投機根本不了解,但就期望可以一年就賺10倍回報,這不是夢想嗎!

 

投資有投資的方法,投機有投機的方法,假如你有大資金,只要用投資的方法就有不錯的回報,但假如你只有小資金,但就想有高回報,不過卻只是用投資的方法,那只能用超長的時間來彌補,讓其不斷增長,但假如你沒有這耐性,相信不出兩三年,你就會放棄。

 

想要學投資不難,只要你肯花點時間和下點苦功,要得到投資的回報率並非太難。不過,假如想學投機,難度就高很多,就等於你要連續多次都要買中一樣,正因為難度高,買中的機會率低,所以回報才這麼吸引,假如係人都可以學到,人人都有錢過超人啦。不過,這也不代表無人可以做得到,而係多少有點技巧和運氣。就好像空中飛人的表演者,對我們來說,根本是無法可以做到,但對於這些久經訓練的表演者來說,每天的表演只係例行公事,根本無難度。

所以,從你現時擁有的資金狀況,與及時間和將來的目標,你就可以算出,你要致富的是投資技巧還是投機技巧,假如你只需要投資技巧,就去學投資,假如你要的是投機技巧,就要朝著高難度的方向走,早點找到投機技巧的竅門吧,千萬不要找錯對象,誤用技巧,結果是兩頭唔到岸,白白浪費了時間。