停左咁耐無寫投資的題目，其實真係有點懶，不過最近又見到好多怪事，所以又來發一下up風。我份人一向係好另類，我又唔係特別鐘意包頂頸，不過我更唔會做應聲蟲，人家所說的，無論是對是錯，我都會用我的方法來驗證一下。

相信而家香港人最熱衷的，當然係投資賺錢啦，有邊個唔想發達先！不過，好多人係諗得好天真，以為投資賺錢真係咁簡單，不過，你想要真係做得好，其實又唔係太難，問題係你如何處理這個問題。

係如最近在某個論壇，就有人興起炒外匯，吸引了很多無知者來看熱鬧，甚至參與，不過，這些人都係耳仔軟，聽人講的多，自己就無認真去學習，以為真係跟人在線上做一下買賣，就可以日日賺幾萬美元。

老實講，我做左咁耐外匯買賣，到而家都無必贏的把握，唔係都唔駛無端端又走去修練啦，睇左咁多書，做左咁多買賣，仲修乜鬼呢！網上我認識了幾位高手，對佢地來講，要賺錢真係像每日例行公事一樣，話都無咁易，一年賺幾百萬港元，甚至一個月賺成100萬的，大有人在，正所謂見慣不怪，至於佢地的功夫和修為，肯定是在我之上，所以人家賺這麼多錢，只能以羨慕的眼光來看。

至於論壇上這些人，我睇左佢地成個星期的對話，其實真係無乜野好講，因為佢地技術分析欠奉，連市場的走勢如何也未能掌握，只係以賭徒的心態來買賣，所以在最近這牛氣衝天的股市走勢中，早就跟紅頂白去沽空，而家十居其九D熊人去左屠房，而至於那位仁兄日日示範如何炒外匯，佢就講到似層層，日日狂賺，是真是假，我們無法得知，不過，就算人家真係靠運氣賺到錢，唔代表你跟佢去做同樣的單都一樣賺到錢。

早陣子其實我都有貼過我過往的模擬賬戶出來，賺左七億多美元，假如我係神棍之徒來呃人，相信這個賬戶可以成為萬人迷，話唔定我仲勁過補習天皇，不過，我一向係實牙實齒，以真功夫打天下，所以不屑做這些衰野去呃人，佢地只係見到人家用超大單量，日日賺幾十點子就可以賺幾萬美元，不過，佢地無諗過這潛在的風險，就係萬一方向錯左，同樣可以這樣快的速度輸掉幾萬美元，甚至係幾十萬美元！

而最近我閉關修練的一個題目，就係如何可以把損失減到最低，正所謂不輸是贏錢。在投資市場，真係八仙過海，各顯神通，沒有一個方法是必賺，也沒有一個方法是沒有錯的，關鍵在於，在何種情況下用何種方法來應對，假如你能處理得好，贏面就大增，而這裡面，就有各式各樣古靈精怪的方法，你話佢對定錯，相信好難有標準的答案，不過，我就喜愛由市場來定奪，總好過因個人喜好做出非理性的決定。

假如你真係鴻福齊天，可以乜都唔識，日日擲硬幣來估公字定方向來買賣，一樣可以賺得比其他人更多都得，只不過理性去睇，這種賭運氣的方法並不科學，同時，一旦幸運之神捨你而去時，你又會怎樣？

至於下單的結果，往往和現實是脫節的，例如最近我就開了一個真的賬戶，交由網友做買賣，過往我曾經出現的情況，就是好像行衰運一樣，你做任何單，都是在輸錢，所以就被人取笑，話我的基本功做得差，咁我又唔介意人家咁講，因為假如真係咁差，就要重新再修練啦。

不過，做左幾個星期，實驗結果又證明俾我睇，原來我的惡運而家轉左去那網友身上，佢而家做得比我更差，一路輸緊錢添，而輸的這些錢係我的！哈哈，邊有人輸緊錢仲咁開心？我開心的原因，並非幸災樂禍，而係我找到借口，俾自己一個下台階，原來做到差成咁並非我的專利，而係人人有份，永不落空！

做外匯最公平的地方，係公平對賭，七隻直盤，21隻叉盤任你揀，多空方向任你做，點解你揀親做的都在輸錢？答案只有一個，就係你獨具慧眼！買六合彩唔見你買中，這些輸錢的你就偏偏中晒！先前人家批評我的，變左佢地自己食番晒，所以可以話係替我平反，咁當然，我又唔係話自己無做錯，只係這個實驗，就像一面鏡，人家下單時點解會做這方向，結果又係點，都清清楚楚反映晒出來。

而事實上，這個月雖然我的收穫唔多，因為仍然係以練功的角度為主，單量不大，但就看預測的走勢結果來決定，這個月做左36單交易，月初的兩單歐羅止損出現了較大的損失，另外三單都是昨日的，其中兩單英鎊在拉均價後小賺出場，而美日係昨晚唔想再糾纏下去所以出場的，所以輸錢的只得這5單，其餘的31單都是有錢賺，而過去兩日所預期的走勢，都估得相當準，所以，我這個不輸是贏錢的策略，初步看來成績算是不錯的，未來幾週，可以繼續這個方式來測試和看實戰結果，假如真係把會輸錢的單數量減少，勝算自然是提高了，未來幾週的收穫應該會反映這狀況。

到目前為止，我的外匯操作資金仍然是在一萬美元以下，就算輸晒都係損失有限，不過，我係以長遠的眼光來看待，假如真係俾我愈做愈好，資金就可以累積，單量也可以加大，到時用外匯來賺大錢，就不再是天方夜談，而係變成實際可行，目前我仍然是以務實和理性的角度來看，希望有朝一日，真係可以把它發揚光大，成為我的投資組合內的一員。