可能會有人覺得我這個問題好傻，不過，到底我係大智若愚，定係大愚若智，睇完這篇文章之後，你地自己去衡量啦。

過往的80年代，是高通脹年代，通脹率一年10%是等閒事，所以當時存款利率高，供樓利率更高，加人工也一樣高，唔好諗住老闆加你10%人工就好高興，因為扣除通脹之後，其實你根本沒有實質的工資增長，換言之，加人工其實係包括左兩個因素，一個係補償通脹的壓力，另一個才是你真正獲得改善的生活質素，假如你年年加人工，都係加得多過通脹，你就有實質的增長和改善生活質素的空間，假如你的人工加幅低於通脹，咁你就唔好彩，做左通脹下的犧牲品！

唔好諗住高通脹已成歷史，而家經濟衰退，通脹唔會再來，實際上你睇一下貨幣貶值帶來的壓力，人民幣升，歐羅升，日元升，澳紐加又升，黃金白銀又係升，而最瘋狂的，係香港的樓價，更係升到連中產也無力再挽的地步！

咁有乜野唔升呀，有，仲可以再減添！就係你地D人工！死未！而家人工無得加，隨時仲要面對減薪甚至失業的威脅，就算你買左股票、基金、甚至係物業的，也只不過係情況好一點，無輸得咁慘而已，因為你計算一下過去這10年，甚至20年，你副身家升左幾多？你的資產又升了幾多？但扣除通脹後，實質的購買力係多左定少左？我夠膽講，能保持跟得上通脹的，經已唔多，能跑贏的更是少之又少，絕大部份的，都係跑輸的！

唔信你可以番睇一下過往的歷史，50-60年代，假如你有100萬，叫做百萬富翁，可以唔駛再做，四圍去環遊世界都得，真正係嘆世界，有鄭君綿唱的歌仔為證架，當年買起成幢唐樓四層，也只係幾萬蚊。不過，到左80年代初期，樓市第一次因為中英談判問題，出現信心危機而急跌，當年買一個400呎左右沙田區的細單位，都唔駛20萬，到了80年代尾，樓價經已跳升到100萬邊緣，以當時的購買力計算，早已超越一般打工仔的購買力，所以當時我早已預言，就算政府居屋，相信都好快會升破100萬！

到了90年代，我這預言真的兌現了，而97年的樓市高峰，7000元至一萬元左右一呎，經已係天價，而結果在亞洲金融風暴之下，樓市急跌60-70%，不過，今時今日的新樓，就話咁易升到上萬元以上，根本完全和實體經濟和購買力脫節，而家做百萬富翁，只係普通人一個，甚至仲要為基本的衣食住行問題而傷腦筋！

就算你係千萬富翁，在通脹蠶食之下，除了尚算安穩，可以買番層樓來自住，還算略有積蓄之外，也不敢對前景過份樂觀，除非你的財富經已去到億萬富翁的階段，否則，你的千萬財富都未必夠你食過世！

政府的高地價政策，其實係最大的元兇推高通脹，因為地價狂升，商鋪租金也不斷上升，最終小市民的日用品和食物等的售價，有多少是變作租金成本？當通脹加劇之後，小市民的基本開支也不斷上升，人工也要調整向上，才可以保持生活的基本開支，結果又回到原來的困局，通脹、租金、人工都在互相追逐，而家香港面對的，係在經濟上最難搞的滯脹局面，實體經濟係半死狀態，但通脹這猛虎就通街走，見人就吃！

而家政客們還在互相廝殺和毆鬥，政府各部門的官僚作風仍然係50年不變，就算俾你明日有直選，都只係在做SHOW，根本不會帶來多少實質的改變，所以我早就不再期望香港仲有乜野大作為，就算而家搞乜鬼六大產業，結果又係鬧劇一場，原因係理想多多，但實際如何執行就根本未到題，仲有就係，這個過渡期又點搞好。

假如香港人人都有錢過四叔和誠哥，咁香港就乜野問題都解決了，不過，普羅市民一日未有誠哥和四叔咁有錢之前，應該如何生活和渡過這難關，佢地就無點認真去諗過，假如在這期間經已餓死晒，下個月俾你掘到石油和黃金都無用啦！

所以，官員們只係在想當然講六大產業如何可以振興經濟，不過，佢地無諗到一個真正的問題，而家這些失業大軍的能力去到邊個層次，假如佢地根本唔能夠做到這層次的工作，又點算好？繼續政府養起晒佢地？積極放任及不干預政策，任得佢自生自滅？拉晒佢地去槍斃，窮人死晒，保證香港無人會失業？定係按照佢地的工作能力和層次，創做這些工作職位來俾佢地可以自食其力好呢？

再培訓計劃，我一早就certify佢係一個失敗之作，原因係培訓完根本完全無理會到實際的經濟環境和需要，想當然地以為培訓完就會有工做，而家玩左咁耐，相信唔駛我講大家都知道成效如何啦！

所以，我一向係坐言起行，靠自己去闖天下，假如你計完數，發覺原來自己搞左咁耐，都係走唔出通脹這個籠，咁你就要重新再思考，以後應該點做至好。而我一早就話過，我一係唔做，要做就要做到最好，所以，我而家開始做的，係投機大法，唔係投資大法，實行同老外和市場大鱷一較高下。唔好諗住無可能或好難，其實最重要係睇你有無耐心同佢玩。

假如我一早就講這個計劃，可能讀者會覺得我係在吹牛作大的機會較高，不過，經過了過去這幾年的鍛練和最近這幾個月的修正，而家我每個星期的操作，雖然唔算係好成功，但都可以算係做到穩定的回報和跑贏通脹，就回顧8月18日當時我開始操作這個賬戶來計吧，當時結餘是1970美元，過埋這個星期就兩個月了，而預期賬戶可以去到4000美元左右，即是說兩個月就賺了一倍回來，咁你計埋落去，半年又會有幾多回報，一年又會有幾多呢？

目前我這個傻佬實驗還在進行中，不過，其實有些網友經已知道我的計劃會點走，假如純以數學的複式增長來計算，兩個月翻一倍，12個月就係64倍了，就算我只係做到一半，甚至只係有1/4，都可以跑贏所有基金經理，通脹這猛虎也追唔到我。至於我係咪真係有能力可以做到這目標，目前我也不敢咁快就下結論，一切由市場和每週的實戰結果來決定，不過，下一個目標係年底前做到一萬美元，假如又可以做得到，就證明我這個做法又向前踏出了成功的一步。

要延續香港人的拚搏和永不言敗的精神，就要靠我們自己去找出路，唔好向現實低頭和屈服，提高自己的競爭力，不斷學習，不斷進步，我而家只係動用了3000美元來做這實驗，相信絕大部份人都有能力拿這資本出來，但成功與否的關鍵唔係錢有幾多，而係技術水平的高與低，假如未來幾個階段的目標我都能一一做到，相信我也可以開始做個自由投資人了，也希望現時失意的香港人，一起來學習和提高自己的技術層次和能力，與其寄望一個無創意又無能力的政府，倒不如靠自己自食其力好過。