本來我最近都收晒火，除左講下大家最關心的投機祕笈及其成效，其餘的廢話都無謂多講，因為唔係咁多人有興趣，同時，講完都係得個講字，講完社會唔會因此而會改變，不過，睇完最近施政報告之後這幾日的事件，再回顧過去十年的歷史，又不吐不快，所以又再寫一篇關於怪論，亦關於投資的文章。

而家香港人人都在做投資和投機炒賣，原因都係得一個，就係有邊個唔想發達，不過想還想，做唔做到先？同樣的，而家政客日日在搞幾時雙普選，不過老實講，我就絕對唔欣賞佢地D所作所為，因為既無幫助，亦無深度，只係在夠爛和潑婦罵街式的抗爭，又或者係應驗左『好佬怕爛佬，爛佬怕潑婦』，不單反映佢地無乜招式，更連最基本的問題都未搞真，而選佢地的市民就更係有眼無珠，所托非人。

你話政府官員不負責任和無能，我絕對唔反對，因為對左幾十年，佢地有乜衰野會唔知，所以當日陳四萬帶住十幾萬所謂精英過渡，只係賣面光的說話，我第一個就唔認同佢虛偽的笑容！至於佢地話行政長官係小圈子選舉，唔代表民意，所以無法有效管治，咁我又唔同意，你睇下陳水扁，佢唔係全台灣人民投了多數票選出來的嗎？夠晒民意啦，但結果係仲衰多幾錢。

做一個譬喻，假如籮內有十個橙，十個都不是完美合格的，無論你點選，用乜方法來選，搵齊成村人來選，結果都係一樣，就係一樣咁衰！明白了嗎？換言之，你想選出來的橙真係要好食，先決條件係個橙的品質，而唔係點樣去選的問題。而家全港700萬人，有幾多人真係夠班去做領導人的？先去看看香港的歷史吧，過去的殖民地統治，英國佬真係會為你地培養接班人？打死都唔信啦，頂多係培訓一D聽話又忠心的狗奴才，而家俾人選左做議員的人，有幾多真係有料到，大家睇左咁耐，心照啦，假如真係全民投票而又咁唔好彩俾佢當選，到時真係仲衰過而家都有份，我第一個賣晒香港的股票基金套現！

而家樓價再次炒到火紅火綠，又有人再次提出買唔起樓的問題，不過，既然過去這十年，做了一連串的政策，又豈能出爾反爾，就算明知有唔妥，都唔敢再搞，因為搞得好唔會有人多謝你，再搞出亂子，又被人批鬥，為乜要去自找麻煩！所以由得佢自由發揮，到隻鑊爆左至再找方法收拾殘局好過啦，反正當衰的一定唔係佢就夠了，不求有功，但求無過，才是為官之道！

不過老實講，政府架構龐大(臃腫的代名詞)，官僚文化根深蒂固，只要跟足程序，就可以把責任推得一乾二淨，但誰人有權檢討程序和檢討程序的有效性和必要性，就無人去理，單係睇下私人土地被人傾倒泥頭的笑料就知啦，苦主變為被告，有冤無路訴，仲要被人告，報官又無人理，可能苦主又可以試下，車兩籮這些泥頭，放在政府合署，然後跪低求特首主持公道，再搵埋傳媒來即場追擊，可能會有D成效。

要將這個低效率政府徹底改變，單靠將來的所謂直選來改變，我相信係天方夜談的笑話，你話做得到我都唔信，原因唔係你想就可以得，正所謂有心無力，除非將來當選者真係有料到，不單有真材實學，仲要有魄力，和真係一心一意服務香港，否則都好難改變目前這個困局！

而當年梁錦松黯然下台，今日又再搞個慳電膽利益輸送，擺明係搞野多過做野啦，假如咁都可以屈人叫利益輸送，咁以後政府官員就規定要來自無產階級，一窮二白至得，否則你有層樓收租，假如將來在房屋政策或賣地方面有乜改變，都有可能被人話有利益輸送！

所以我對政府的所謂有效管治和解決民困，失業等社會問題，早就不再有任何期望，甚至係絕望。而經過我做了幾年的傻佬實驗，而家總算係有些少成績可以貼出來，為過去一連串的失敗挽回一些面子，但在未找到有效的方式之前，我都好似佢地咁，日日在思考，點至可以做得到！不過，我就實牙實齒做左好多試驗，而唔係好似佢地咁低B，以為乜都唔駛做，日日死剩把口在大隻講，以為咁就可以徹底改變現狀。

不過，市民大眾對這些問題認識有限，成日以為做投資炒賣係好簡單，而結果大家有目共睹，參與這遊戲的人，香港隨時有一百幾十萬人，但真係做得成功，能在市場穩賺的，又有幾多人呢？絕大部份的人，根本就無認真去做，淨係成日識得去問人買邊隻，又懶，又唔肯學習，更唔捨得花錢買書，假如咁樣都俾佢賺到上岸，除非佢真係鴻福齊天，否則就真係天無眼！

所以，普羅大眾的投資炒賣結果，其實可以預計得到，大部份人是輸錢，一部份人只能小賺，只有很少部份的人，才可以穩賺和創造財富，你是屬於那一類？假如你對目前的狀況不滿意，又會點做去改變佢？繼續發白日夢，望天打卦，定係發奮圖強，認真去再學習應該如何投資和炒賣？