香港新浪網 MySinaBlog
« 上一篇 | 下一篇 »
Norman | 24th Oct 2009, 10:53 PM | 善意提醒 | (1723 Reads)
 

假如有睇警訊的節目,相信好多人都聽過倫敦金騙案的故事,大家唔好諗住這些只是以前發生的事,就算今時今日,仍然有好多人在做緊傻仔俾人呃,本來做金融買賣係你情我願,不過好多人就係因為一個貪字,自己又唔熟識,結果可能就係咁被人呃左一大筆錢,甚至可能係半生的積蓄!

   

而家香港的法例,只係有規管扛桿式外匯買賣,但對於黃金買賣,一向係龍蛇混雜的地帶,所以就有好多人利用這些灰色地帶來搵食呃人,所以今日就來披露一下這方面的實況,既可以提醒一下讀者唔好中計,另一方面,亦可以澄清一下很多人對這方面的誤解,自己應該好清楚這類產品是甚麼,是否適合自己投資。

 

而家在很多論壇上,好多經紀或推銷員,都係寫一D好誤導的言論,讓普羅大眾以為做這些投資係好容易賺錢,同時,引誘客人主動去搵佢地,其實,假如客人去搵佢地,咁經已係把自己置於一個不利的位置,因為經紀主動去call客,就可能違犯專業守則和監管條例,但客人去搵佢地就唔算犯規,同時,一旦將來出現爭執,客人就唔可以話自己乜都唔識而被騙,正所謂牛唔飲水唔按得牛頭低!

 

先來看看經營這些黃金買賣的機構吧,有銀行,匯商,甚至係只做黃金買賣的公司,有些係正當經營,有些係掛羊頭賣狗肉。客戶參與這些買賣,目的只有一個,就係在這些買賣中賺取價差而獲利,至於經營機構佢地的盈利來源,包括了提供買賣時賺的買賣差價,過夜利息,甚至有佣金,手續費或服務費,個別公司甚至還會把價差擴闊到遠超正常水平,作為回佣給經紀,假如係正當經營的機構,都會把所有這些收費清楚列明,不過,坊間有些機構,係從來唔敢寫清楚到底會收幾多,到你開左戶時就任人宰割啦!

 

至於這些機構是在和客人對賭,定係只賺差價,這點我就不予置評,因為每家機構的經營策略不同,最重要就係當客戶賺大錢時是否能依約俾錢,而這方面就要睇這些機構的實力和信用了。所以我一直只係搵銀行或外國的大匯商來做買賣,就係唔想冒這方面的風險。

 

至於這些機構來拉客,當然係希望能多點客人來做買賣,從中賺取這些收益啦,假如佢地只係賺這些錢,本來係無問題的,不過,這過程中,就涉及到另一些更重要的誠信問題:

 

第一,就係有些公司根本並非真正經營這些業務,只係呃客人來開戶,然後再哄騙客人簽署授權書,代為操作買賣,而實際上所有買賣都是虛構的,當然單單都係蝕錢的啦,否則又點可以呃晒客人的錢!所以這些是百分百的騙徒!而警訊以前披露的案件,多數是屬於這類型。

 

第二,就係這些公司的確係有經營這些業務的,不過,佢地本身代客買賣的目的,並非真正為客人賺取利潤,相反,佢地係以收取客人買賣的服務費來過活,一旦取得客戶的授權書,就會瘋狂買賣,至於方向是否正確,能否賺到錢等,就絕對唔係佢地要考慮的事,例如每一手買賣收100元的服務費,每日買賣100手就淨收一萬元,這是袋袋平安的收費,至於客戶的賬戶能否賺錢,就各安天命,所以,大部份的客戶,佢地賬戶內的錢不用一兩個月,就係咁被人吸乾!先前我所介紹的『容錯交易系統』,這是懷疑屬於這類型,有興趣的,不妨看看原文

http://qanorman.mysinablog.com/index.php?op=ViewArticle&articleId=1927996

 

正所謂光棍佬教仔,便宜莫貪,邊會有咁大隻『蛤那』通街跳,不過,又唔知點解,日日真係仲有咁多『蛤那』四圍走俾人呃!唔好諗住那些代客操盤買賣的經紀好叻,不妨又睇下事實吧:

 

第一,佢地並非甚麼生神仙,只不過係後生仔女一名,甚至好多仲係剛畢業,根本未有社會經驗和工作經驗,只係叫做係咁意上過幾堂課,再唸熟一些技術分析的名詞,就可以舢板充炮艇,出來扮專家嚇人,你把錢交俾佢地代為操作,勝算有幾高,自己諗下啦!我就曾試過在網上俾一些香港某大金融集團的後生仔女來搵我開戶代操盤,講真,我仲叻過佢,真係笑死觀眾,再講,就係我一向對佢這間公司無好感,背景唔乾淨,搵鬼信。所以我一向只會幫襯銀行和外資大行,這些龍蛇混雜之輩,都係敬而遠之好。

 

第二,佢地有些人在論壇上話自己有幾巴閉,用幾多錢一個月就閒閒地賺十萬八萬,不過,從來唔會有真實的交易貼出來,多數只能得把口在吹水,真實交易資料欠奉的多。就算真係有真實的資料,都係輸到半死,甚至爆埋倉的,根本就未夠班,咁樣的表現,肯俾錢佢地代操作的,不如索性捐去做善事啦,起碼都可以積一下福。

 

第三,仲有就係,佢地這些經紀,底薪有幾多?其實人工一定唔會高,主要係靠拉客,然後賺取客戶的服務費過活的,假如佢地真係有本事,自己做炒賣都可以搵十萬八萬一個月,仲駛乜打這份牛工去呃人,乾脆專職做炒賣都得啦!

 咁係咪整個行業都係咁得人驚和靠呃的,這個我又相信不一定,只不過外行人好多時根本唔了解,以為真係開個賬戶就會有人代佢賺錢,這只是一廂情願和太天真的想法,而事實上,最近我也有在外匯平台上買賣一下黃金,假如你真係睇得準,係可以賺到錢的,不過,就絕對唔係那些人吹噓到咁簡單和咁容易,所以,想要在市場上賺到錢,就一定要用功,技術水平要達標,同時亦要有臨場的經驗和技巧,才可以提高勝算,至於那些人吹噓,話波動大就賺得快,那只是騙人去開戶的說法,其實佢地無講個事實出來,就係你睇錯方向的話,可以輸得更快!唔信就即管來做幾單試一下,你就會體驗得到,我所講的係真話定係假話。  

[1] 大家做倫敦金/銀投資時要特別小心!

emotion

大家做倫敦金/銀投資時要特別小心!設勿將閣下的該投資戶口密碼交給任何人呀!包括閣下的經紀呀.因為閣下要對閣下的投資負責任呀!而且投資前要問清楚呀!請勿心急呀!即使閣下的經紀催促做買賣決定下也先停下來,想清楚呀!小心做金融大鱷點心呀!有人在2010年中不幸幫襯天譽國際金業有限公司( Prestige ) 的經紀後出事啊.電郵地址: admin@pibullion.comQQ : 4006762425網址: http://www.prestigegroup.com.hk/index.php有人在那裡投資倫敦金,被那公司姓陳及姓林兩女經紀遊說交密碼使她們代為投資,但原來她們投資經驗好差,好容易就輸清光.所以做倫敦金買賣就不可以假手於人呀,要親力親為呀!之後竟然被自稱那公司男職員電話警告不可以投訴啊呀!希望那公司加強監管經紀啦.

楊
[引用] | 作者 | 15th Jan 2013 12:37 PM | [舉報垃圾留言]