香港而家變成一個問題社會，其實也是因為有好多人根本日日在發白日夢，連自己應該要做乜都唔知，唔好諗住這些人係低下階層或教育水準不足的才有這情況，事實係就算專業人仕或政府官員，好多仍然係懵下懵下咁做人！

以前香港在貧窮年代，人人只會努力奮鬥往上爬，所以精力不會白費，都是集中在做有益有建設性的事，而家大部份的中年人，有邊個當時唔係捱窮的，香港有今日的富庶，就係大家勤勞累積財富的成果，不過，而家D人就開始倒自己米，日日在搞事和批鬥，精力唔係放在如何把事情做好的宗旨上，而係諗下點樣去搞鬥爭，結果就係成事不足，敗事有餘，香港這去這十年，就係咁樣混日子地過去了。

而經過了這十年的虛耗，看來醒覺的人不多，大家繼續在這批鬥遊戲上你爭我奪，想做批鬥之皇，但事實上這只是害己害人的做法，最終只會是人人受害，社會停滯不前，香港的經濟沒有起色，市民的財富沒有增加，係全輸的局面，那些滿口仁義道德，為民請命之輩，有幾多真係用心去做，定抑或只係掛羊頭，賣狗肉，做些表面工夫就當係交差了事？真正要做的工作，多到唔知要寫幾多頁紙，不過這些都係留待俾下一任，甚至下下下一任的人去做，反正下一屆係邊個做都唔知，呃得一日得一日！

而家日日在玩法律，表面上好似好正義，好官腔，不過，假如係把這些事件變為私人企業上的例子，就全部都不合格，假如我係老頂，晨早就炒晒佢地，這些問題的根源佢地根本就無理到，而事實上要糾正這些問題根本就好簡單，只係你是否願意去做的問題，唔存在甚麼困難。立法會議員的職責應該做甚麼？律政署又應該做甚麼？法院又應該做甚麼？

法律條文的漏洞和不足，那些部門該負責去修正，而負責的人而家又做緊乜？而家好多時係好做唔做，年30晚謝灶！結果就係法律的漏洞無人去理，條文過時和不能與時並進，法院判決就無說服力，大家鬥玩官司遊戲，不過，最搞笑的係，原來法院的判決係無牙老虎，判左邊個敗訴，唔代表勝方可以得到應得的賠償，敗方唔賠償原來一樣無事的！咁樣的司法制度原來係我地一向自以為係香港成功的重要基石之一！

法律條文真係咁難搞咩？我又唔相信，假如真係搞唔掂，只係反映負責的官員，一係無心戀戰，一係無能！假如我們尊貴的議員，做番立法會議員應做的事，先去搞掂自己的工作，就可以馬上糾正這些問題，搵埋律政署和法院，一起檢討現時面對的問題，法律的灰色地帶等，作出有建設性的修訂，就可以慳番好多不必要的爭拗和資源，大家把精力用在對整體有利的事情上，才是對社會和市民負責。

而家日日見到的事情，其實同20多年前，我在某上市企業的情況很類似，部門之間互不信任，缺乏溝通，有甚麼請求希望其他人需要支持的，都不會坦承提出，結果就只有互相指責，互相怨對，甚至係互相猜忌！其實要解決好簡單，不過，官僚架構就係咁，你有你up，我有我做，因為大家都係官，我出份糧又唔關你事，唔駛賣你賬，佢地唔係以大局為重，更唔會以社會或市民的利益為依歸，而係以佢地自己的利益為依歸，所以而家政府官員，根本係自私自利的極品，單係以減薪為例，高級的有高級說待遇不合理，中級的又說中級的調整不合理，低級的又說自己的待遇不合理，而事實係點？佢地假如真係認為自己咁值錢，可以年薪1000萬，就索性劈炮唔撈啦，佢地假如真係唔做，我相信有90%的人根本搵唔番咁好的待遇，大把人等住去做佢份工呀！一個月十萬八萬人工，減三幾千都話唔公平，咁那些賺一兩萬人工一個月的人，又如何過活呀！係咪過份得離譜！

所以，特區政府應該要考慮的，是將來新一代的公務員，不單是要有能力勝任其工作崗位上的能力，更要經過品格挑選，真係願意服務市民，和肯犧牲小我，完成大我的才可以聘用，否則，請埋成班廢柴，樣樣都以自己的私利先行，咁樣的品德，點樣可以叫人信服！