香港新浪網 MySinaBlog
« 上一篇 | 下一篇 »
Norman | 6th Jul 2013, 6:06 PM | 怪論 | (188 Reads)
 講到特區政府的無能,相信房屋政策和土地政策一定上首三位,而事實上這個問題不是回歸後的問題,回歸前早就埋下伏線,而我地的所謂專業團隊公務員隊伍,佢地諗的對策,有時真係低B到你唔信,所以不單是無能,更是無知和無奈的混合體!佢地也可以算係『三無人仕』之一!   

港英年代點解咁大力推『高地價』政策,因為這是不勞而穫的方法,乜都唔駛做,坐定定係度,就有人把真金白銀送上門,假如我係英國佬,我都會咁做,因為限時發達,日日倒數,在回歸前盡地一煲,掠得幾多得幾多。

 

而先前我晨早就講過,香港的公務員隊伍,最叻係乜?就係Yes Sir,收上級柯打做野就得,叫佢自己諗就無乜新意,除左抄英國佬這條計之外,仲有乜計可施?所以就繼續這個高地價政策的遊戲,董伯伯當日眼見樓價高到嚇人,於是就大發慈悲,諗住起多D樓出來,本來出發點是好的,可惜生不逢時,遇岩金融風暴,結果股市樓市狂瀉,佢就馬上食左這隻死貓,其實由佢講左這個政策到樓市急瀉,只係短短半年光景,根本椿都未打,樓都未見影,但而家香港人係智商愈來愈低,連這些基本的分析力也在退化中!假如香港人咁想樓價大跌,叫梁振英係咁意提一提重新考慮八萬五這個計劃吧,可能仲勁過聯儲局主席的收水言論架,好過搞咁多花臣野!

 

這隻鑊到了孫公公和當奴曾手中,就更加搞笑地急剎車,唔再起居屋,唔主動賣地,結果新樓供應跌到歷年來的新低,在供求嚴重失衡的情況下,樓價唔急升至奇。而家梁振英上台,就搞到搔晒頭去補鑊,不過佢地班官員又在搞另一個笑話出來,就係捉錯用神去玩二手居屋市場。

 

居屋政策推行多年,出發點是為買唔起私樓的小市民,以較低的價格買入單位自住,最初甚至有10年的凍結期不准轉賣,只作自住用途,目的就係避免炒賣,但唔知點解,而家居屋有些可以幾年就自由買賣,這不是和當初的做法背道而馳嗎?同時也在助長轉手圖利,而新推的政策更搞笑,美其名話活化居屋二手市場,但實際反映官員對居屋市場的無知!

 

假設而家私樓價格是500萬,同面積的居屋市價是私樓的70%,即係350萬,假如你咁好彩買到這個居屋單位,在甚麼情況下你會願意賣左佢?正常情況下不外如是以下幾個情況:

 

第一是你發左達,而家幾億身家,當然會考慮賣左間居屋,搬去半山豪宅。

第二是你而家失業,連居屋也快無力供樓,只有儘快賣埋佢搬走,又或者被銀行收樓變成銀主盤拍賣。

第三是你要移民,舉家要離開香港,當然順理成章賣埋佢走啦。

第四是原業主告老歸田返鄉下養老,所以賣埋佢套現。

第五是原業主百年歸老,後人套現變賣。

 

假如你不屬於這幾種情況,無穿無爛,但又未發達,咁你為乜要賣左間居屋,去換一間更貴的私樓來住?假如你仍然在香港生活,就算你賣左佢再買另一間,實際上只係一間換一間,在樓宇的供求上來看,整體數量沒有改變。

  再講,就算你真係要賣間居屋,會否因為無錢補地價而影響你無法賣出?以前有銀行可以短期的私人貸款形式借埋俾你週轉,又或者而家日日賣廣告的財務公司,相信佢地都會大開方便之門,反正你有間屋在手,只要市價遠高過補地價的價格,就賺硬這貸款的利息。

所以二手居屋的供應量,視乎有多少居屋業主有換樓或賣樓的意慾來決定,並非你想活化就會有人願意拿出來賣,而家無端端俾多5000個名額去搶這些限量供應的二手居屋,價格唔飛漲至奇啦。

 

至於土地價格,政府而家係處於兩難局面,一方面係政府的主要收入來源,假如大力推低樓價地價,肯定政府也要面對財政壓力,因為政府而家無乜產業可以提供穩定的收益,全都被高地價政策趕盡殺絕了。結果而家左右為難,每年有幾萬個新買家想買平樓,樓價太貴又被人鬧,但大幅推低樓價又俾現成的100萬個小業主鬧,同時政府的收入又會面對壓力,點算好?

 

其實政府在這方面應該把房屋政策重新定位,房屋既是市民的必需品,但同時也是投資工具,假如你將佢地炒埋一碟,當然是兩邊不討好,那麼,可以把它們分開兩碟嗎?當然係可以啦,問題係政府有無魄力去做。

 

當年前任港督麥理浩的十年建屋計劃,是香港當時的偉大德政,解決了最迫切的房屋需要,而家政府其實可以考慮,把細單位的建屋主動權全面收回,由政府策劃推動,又或者可以外判給承建商幫手建屋,但最終以政府的價格機制來發售。而私人發展商主要是以提供較大和較優質的單位為主,這樣就可以把房屋市場一分為二,市民的基本需要由政府控制建屋量和價格,就算以較低價格甚至補貼又如何,反正都是政府的錢,用來補貼本地市民,相信一定唔會有人反對,可以用居屋的形式,規定10年內不得轉售,又或者只可以售回給政府,同時每人只可以享用一次這福利。

 

至於私人發展商的客戶,主要是提供較大的單位, 或者是超豪單位,對象主要是高消費高收入族群,甚至是富豪或投資客,你賣到三萬蚊或五萬蚊一呎又如何,和小市民有乜直接關係,政府既可以穩定小市民的住屋需要,又可以繼續以超高地價賣地,發展商又可以賣全世界最貴的物業,地產經紀亦樂於賺取勁高的佣金,投資者和富豪又樂於買賣這些豪宅獲利,實行各取所需,一舉數得。不過,而家我地的賣地政策,又在搞笑地限制港人港地,只准起細樓,唔准起大樓,這不是倒行逆施嗎?

 投資市場從來就是由資金流向來主導,只要有獲利的空間,就有資金來搵食,假如政府咁鍾意控制價格,唔該得閒就去賣多點匯豐,中電等,去番25年前的價位俾我再低位買過啦,87年股災後,匯豐當年只是8蚊左右,仲未計合併和分拆的影響,恆基恆隆等都係幾蚊一股,而家政府強迫小市民個個月去高價接貨買強積金,都好唔人道架,推低恆指俾多D人低位買貨,好過而家買港股的強積金年年在蝕錢,唔知會唔會遲D變成另一個潮流或市民的集體訴求呢?

[1] hey my fd

好耐無見!!!
Msn 轉左skype 就唔見埋你,最近點呀,你又無上fb,

kinki
[引用] | 作者 kinki | 24th Jul 2013 3:05 AM | [舉報垃圾留言]